महानगरलाई कर नतिरिकनै मेला आयोजना

देशकै सबैभन्दा पुरानो व्यापारिक संस्थाका रुपमा रहेको मोरङ व्यापार संघले विराटनगर महानगरपालिकालाई तिर्नुपर्ने करसमेत नतिरेको पाइएको छ । संघले महानगरलाई मेला आयोजना गर्दा दैनिक ५ हजार रुपैयाँका दरले १० दिनको ५० हजार तिर्नुपर्ने थियो । त्यस्तै टिकटको बिक्रीको ५ प्रतिशत र मेलाभित्र राखिएका विभिन्न खेलको समेत कर नतिरेको पाइएको छ । पटक–पटक तागेता गर्दा पनि संघले कर तिर्नेतर्फ ध्यान नदिएको महानगरपालिकाका राजस्व महाशाखा प्रमुख सरोज गौतमले जानकारी दिए । उनले भने, “अहिलेसम्म मेला आयोजना गरेबापत मोरङ व्यापार संघले कुनै पनि कर बुझाएको छैन । पटक–पटक ध्यानाकर्षणसमेत गराएका छौं । मेला आयोजना गरेबापत हामीले लिने सबै कर जसरी पनि लिन्छौं ।” मेला आयोजक समितिका संयोजक अनिल साहले महानगरपालिकालाई अगाडि नै कर तिर्नु जरुरी नभएको बताए । मेला सकिए पनि आवश्यक सबै कर तिर्ने उनको प्रतिबद्धता थियो । “हाम्रो संस्था यही छ, हामी भाग्ने होइनौं । महानगरपालिकाले तोकेको सबै कर हामी मेला सकिएपछि तिर्नेछौं,” संयोजक साहले भने ।