प्राचीन मिथिलाक्षेत्रमा दशहरा पर्व सुरु भएको छ। महोत्तरीसहितका क्षेत्रहरूमा आज महोत्सवको पहिलो दिन कलश यात्राका साथ घटस्थापना गरिँदैछ। मिथिलामा यस पर्वलाई ‘दशहरा’ भनिन्छ, र यो शारदीय नवरात्रको पहिलो दिनको रुपमा मनाइन्छ।
मिथिला परम्परामा दुईवटा नवरात्र मनाइन्छ: असोज शुक्लपक्षको प्रतिपदादेखि नवमीसम्मको शारदीय नवरात्र र चैत शुक्लपक्षको प्रतिपदादेखि नवमीसम्मको वासन्ती नवरात्र। देवीपूजन र आराधनामा दुवै नवरात्र महत्वपूर्ण भए पनि शारदीय नवरात्रको मनाउने परम्परा निकै पुरातन र धूमधामले मनाइन्छ।
मिथिलाका देवी शक्तिपीठहरूमा कन्याकुमारीहरूले आज धार्मिक महत्वका नदी र सरोवरबाट माटाका नयाँ घडामा जल भरेर ल्याएको जल देवीको प्रतिमा र मन्दिर परिसरमा अभिषेक गर्दै घटस्थापना गरिन्छ। आज बिहानैदेखि बस्तीबस्तीमा कलश यात्राका कार्यक्रम भइरहेको छ।
महोत्तरीको पञ्चधुरा माईस्थान मन्दिर, सोनामाई मन्दिर, र राजदेवीस्थानमा घटस्थापनाका लागि कलश यात्रा सम्पन्न भएको छ। यस क्रममा स्थानीय जनताले नदी र सरोवरबाट जल भरेका घडाहरू लिएर झाँकी र बाजागाजासहितको यात्रा गरेका छन्।
कलश यात्रामा कन्याकुमारीहरूले भरेका घडाको जलबाट घटस्थापना गरिन्छ। घटस्थापना गरिएसँगै शक्तिपीठ र देवीका प्रतिमाहरू बनाएर दुर्गापूजा गरिनेस्थलमा जौ, तिल, गहुँ, धान, र मकैसहितको जमरा राखिन्छ।
दशहरा पर्वको आगमनसँगै मिथिलामा मङ्गल धुन गुञ्जिएको छ। बस्तीहरूमा देवी भजन गाइँदैछ र बजारमा चहलपहल पनि बढेको छ।
